បុរស ប្រមឹកម្នាក់ផឹកស្រាស្រវឹងប្រចណ្ឌ វាយប្រពន្ធកូនដុតផ្ទះខ្លួនឯងចោលបានអស់ចិត្ត
04-June-2016 | ដោយ មែន កំសត់
ខេត្តប៉ៃលិន ៖ បុរសជាមនុស្សប្រមឹកម្នាក់ ត្រូវសមត្ថកិច្ចនគរបាលប៉ុស្តិ៍អូរតាវ៉ៅធ្វើការចាប់ខ្លួន បន្ទាប់ផឹកស្រា.សស្រវឹងជោកជាំ កើតភ្លើងប្រចណ្ឌទៅរករឿងវាយប្រពន្ធកូន រហូតឈានដល់ដុតផ្ទះខ្លួនឯងចោល បណ្តាលឱ្យឆេះខ្ទេចអស់គ្មានសល់ទ្រព្យសម្បតិ្តអ្វី ប៊ិះនឹងឆេះផ្ទះអ្នកជិតខាងទៀត ។ ហេតុការណ៍នេះ កើតឡើងកាលពីវេលាម៉ោង១០ និង១០នាទីយប់ថ្ងៃទី០៣ មិថុនា ២០១៦ ស្ថិតនៅចំណុចសែងឈ្លូស ក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ។
ចាត់ទុកថាសំណាងមួយដែរ ព្រោះខណៈភ្លើងកំពុងតែឆេះយ៉ាងសន្ធោសន្ធៅនោះ ត្រូវកូនៗនាំគ្នារត់ចេញទាន់ពេលវេលា កុំអីក្លាយទៅជាចំណីភ្លើង ជាក់ជាមិនខាន ។បុរសប្រមឹកដែលដុតផ្ទះខ្លួនឯង ឈ្មោះលី ទី អាយុ៥២ឆ្នាំ ជាកម្មករ មានស្រុកកំណើតរស់នៅភូមិថ្មី ឃុំស្រែស្តុក ស្រុកកណ្តៀង ខេត្តពោធិ៍សាត់ ធ្លាប់មានប្រពន្ធមុនតែស្លាប់ មានកូន២នាក់ ប្រុស១-ស្រី១ ។ ចំណែកប្រពន្ធក្រោយនេះ ឈ្មោះចិន ចាន់សុខុម ហៅច្រឹប អាយុ៤៦ឆ្នាំ ជាកម្មករដែរ មានប្តីពីមុន តែលែងលះគ្នា មានកូនស្រីចំនួន២នាក់ មានស្រុកកំណើតរស់នៅភូមិរំលេច ឃុំរំលេច ស្រុកបាកាន ខេត្តធិ៍សាត់ដូចគ្នា ។
បច្ចុប្បន្ន សុំដីគេស្នាក់នៅក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ។ ក្រោយទទួលពាក្យបណ្តឹងពីស្ត្រីរងគ្រោះជាប្រពន្ធ កម្លាំងបានចុះទៅចាប់ខ្លួន នាំមកប៉ុស្តិ៍អូរតាវ៉ៅ ដើម្បីសួរនាំ និងកសាងសំណុំរឿងបញ្ជូនទៅអធិការនគរបាលក្រុងប៉ៃលិន ។
ស្ត្រីជាប្រពន្ធបានរៀបរាប់ថា គាត់ស្គាល់គ្នាជាមួយបុរសជាប្តីខាងលើ ហើយយកគ្នាជាប្តីប្រពន្ធអស់រយៈពេល២ឆ្នាំហើយ តែមិនមានកូនទៀតនោះទេ ។ ហើយបានសុំដីថៅកែសង់ផ្ទះប្រក់ស្បូវស្នាក់នៅជាបណ្តោះអាសន្ន (ទទឹង៣ម៉ែត្រ និងបណ្តោយ៤ម៉ែត្រ)។ គាត់បន្តថា ក្រោយពីរួមរស់នៅជាមួយគ្នា ប្តីគាត់មិនគិតខិតខំប្រឹងប្រែងធ្វើការរកស៊ីចិញ្ចឹមគ្រួសារទេ ដោយមួយថ្ងៃៗគិតតែដើរផឹកស៊ី តាំងពីព្រឹក រហូតដល់ល្ងាច ចូលផ្ទះវិញរករឿងជេរបញ្ចោរដេញវាយប្រពន្ធ-កូន រត់ចូលផ្ទះគេប្រសាច ។
គាត់បន្តថា នៅយប់ថ្ងៃកើតហេតុ ខណៈឃើញប្តីស្រវឹង គាត់ក៏ដើរចេញពីផ្ទះ ទៅពួនសំងំអង្គុយមើលទូរទស្សន៍ក្នុងផ្ទះអ្នកជិតខាង ស្រាប់តែប្តីគាត់ បានទាញអង្ករដែលសល់បន្តិចបន្តួចទុកដាំបាយហូប និងសំលៀកបំពាក់យកទៅដុតចោលនៅក្បែរនោះ ហើយបានអ្នកជិតខាងជួយពន្លត់ទាន់ពេល ។
ស្រាប់តែក្រោយមក ប្តីគាត់បានយកភ្លើងទៅដុតផ្ទះ បណ្តាលឱ្យឆេះទ្រលោមផ្អើលអ្នកភូមិរត់ទៅជួយពន្លត់ តែដោយសារទឹកនៅឆ្ងាយពន្លត់មិនទាន់ ក៏ឆេះអស់រលីងតែម្តង ។ សំណាងល្អ អត់មានខ្យល់បក់បោកមកពីទិសខាងលិច កុំអីឆាបឆេះផ្ទះអ្នកជិតខាងអស់ជាច្រើនផងដែរ ៕
ចំនួនអ្នកទស្សនា
- ថ្ងៃនេះ1681
- ម្សិលមិញ14181
- សប្តាហ៍នេះ1681
- ខែនេះ116831
- ឆ្នាំនេះ116831
- សរុប20559287